About Me

Purpose of MOWA Blogs: “Let there arise out of you a group of people inviting to all that is good (Islam), enjoining Al-Ma’ruf (i.e. Islamic Monotheism and all that Islam orders one to do) and forbidding Al-Munkar (polytheism and disbelief and all that Islam has forbidden). And it is they who are the successful.” [Quran 3:104] To provide the members and non-members alike the values and benefits of the knowledge of Islam thru worthful shared on-line journal where people can read and eventually share it to others.

Friday, July 29, 2011

Mahinang mo Ammal Ibadat ha Bulan Ramadan
( Fahad Haris )


In hambuuk muslim apabila mabut na in bulan Ramadan subay niya taliun iban pikilun bang biyaddiin in hikahinang niya ammal ibadat ha bulan Ramadan , hasupaya siya dih malussung iban malugih minsan maubus na in bulan Ramadan , nah! daing ha sabab yan yari in daing ha mga tiranan hikahinang mu ammal ibadat ha bulan Ramadan .

1. Pag-pabukah ha tau nag-puasa
حديث زيد بن خالد الجهني رضي الله عنه، عن النبي صلى الله عليه وآله وسلم قال: ( من فطر صائماً كان له مثل أجره، غير أنه لا ينقص من أجر الصائم شيء ) رواه الترمذي ، و النسائي ، و ابن ماجة ، و ابن خزيمة ، و ابن حبان في صحيحيهما، والحديث قال عنه الترمذي : حسن صحيح، وهو صحيح
Hatiniya : hisiyu-hisiyu in makapabukah ha tau puasa in kaunan niya tungbasan siya sin tuhan biyah sin pahalah sin tau napabukah niya , ha dih hilang sin allah in pahalah sin tau amuin biyabukah niya hangsulag unu-unu .
Duun ha pag-pabukah yan mataud in hantangan niya , walah tiyutat bang unu in hipabukah mu ha tau nag-puasa lamud na di haini minsan dakuman tubig makadawhat kaw sin pahalah . ayaw sadya in hipabukah mu amuin mga hiyaram sin allah biyah na sin alak atawa kan siga iban na sin katan piyanglangan sin sarah adapun in hantangan sin pag-pabukah duun naka amuin dumihil ka sin ha tau nag-puasa karnah hasupaya hipami niya sin pag-bukaan niya atawa kan ikaw na in mami sin pag-bukaan niya , daing ha sabab yan landuh in luhay dumawhat sin pahalah iban karayawan pa mga sila aun gaus mag-pabukah sabab diin-diin na in taud sin napabukah niya bihatu daisab in taud mahasil nila pahalah iban karayawan .
2. Subay layuan sin tau puasa in magkita tv –amuin wayruun kapaiddahan niya iban na sin pag-dungug music kalangan sabab wajib ha tiyap-tiyap nag-puasa in subay niya palihalaun in waktu niya sartah usalun niya duun ha hikamumpaat kaniya iban usalun niya mag-ibadat pa allah mahasutsi mahatinggi .
3. Subay mu parihalaun in waktuh sin pag-taymah sin duwaa biyah na sin ha dih pakaw makabukah ayaw mu kalupahi mangayuh duwaa pa allah sabab in duwaa sin tau puasa tiyataymah sin tuhan hangkan daing ha sabab yan ayaw kaw tuud maligap sin dugaing ha dih pakaw makabukah hasupaya kaw maka duwaa pa allah mangayuh sin kabayaan mu duun naka parakalah manunjuki ha dunya atawa kan parakalah manunjuki pa agama in yan katan bilang da ha sarah .
4. Ayaw mu kalupahi in mag-baktih ha duwa maas mu ha bulan Ramadan ha sahbu kaw nag-puasa sabab in pag-bagti ha duwaa maas labi awla na tuud bang ha bulan Ramadan daing ha mga sabab hikadawhat mu mu karidaan sin tuhan sabab lipat-manglipat in karayawan niya , bang wayruun da tuud udjul mu dakulah in labi marayaw dahun mu in maas mu mag-lundang panun ha bulan Ramadan , duun naka mag-unay-unay kamu iban sin duwaa maas mu ha pag-bukah atawa kan tabangan mu sila ha mga parakalah ha bay .
5. Bang wayruun da udjul mu in labi marayaw matug kaw timprano hasupaya kaw makabatih sin tungah dum makasambahayang tahadjud iban hasupaya kaw dih karauun tumunay sin samabahayang subuh , iban hasupaya mu kaammalan in mga duwaa sug-sugun ha puas sin sambahayang subu , sabab in mag-jaga dum ha wayruun kapaiddahan niya mahinang siya hambuuk tiranan amuin dih mu hika ammal ibadat marayaw sin puas subu sabab makaruh .
6. Pag-lugtuh iban pag-anad kaw ha bulan Ramadan amuin tuminggal sin mahsiyat iban mga piyanglangan sin allah , sabab in bulan Ramadan mahinang siya sin hambuuk muslim amuin biyaatun niya in baran niya tumingal sin mga piyanglangan kaniya sin tuhan , daing ha sabab yan ha tungud sin sila mag-siga ha bulan Ramadan waktu nila na in mag-balmula sin baran nila amuin inut-inutun nila na in pag-tinggal sin pag-siga , sabab in mag-siga hikamudarat in baran iban akkal hangkan siya hiyaram sin tuhan , damikkiyan niya wajib aniban in mag-limut iban mag-tumbih ha bulan Ramadan .
7. Bang kaw makagaus ha bulan Ramadan pag-umra kaw pa baytullah sabab lipat-manglipat in pahalah sin pag-umra ha bulan Ramadan .
8. Bang kaw aun panghati mu ha agama islam in labi maryaw amuin ikaw in mag-imam ha masjid , hasupaya kaw makadawhat sin tutungbasab dakulah , sartah duun ha pag-imam mu yan wajib in subay agarun mu amuin tiyutat kaymu sin allah iban rasul niya bukun in agarun mu amuin kabyaan sin mga sila manusiya , sartah duun ha pag-imam yan subay tuud kaw mag-ikhlas pa tuhan bukun karnah sin altah atawa kan saddaka hasupaya mu madawhat in pahalah daing ha tuhan .
9. Wajib ha tiyap-tiyap imam sin kamasjiran amuin pahatihun iban hinduan nila in mga mahmum sin hukuman sin pag-puasa hasupaya sila dih maawam .
10. Subay palihalaun in pag-ihtikap ha masjid labi awla na tuud ha hikahangpuh kahinapusan sin bulan Ramadan .
11. Subay niya parihalaun in sambahayang lima waktuh barjmaa ha masjid sabab wayruun pus sin pag-puasa bang dih siya mag-sambahayang lima waktu sartah bang wayruun sambahayang niya lima waktu wayruun da bistahun kaniya .
12. Parihalaun niya in sambahayang tarawi sabab tiranan hika ampun sin dusa .
13. Subay niya pataurun in pag-bassa sin qur-an sabab in qur-an maka sapaat ha rtau nag-bassa kaniya ha adlaw kiyamat .
14. Subay nila pataurun in ammal ibadat niya ha bulan Ramadan daing namayan ha pag-bassa sin qur-an iban pag-jikir mabut na papag-samabahayang niya sunnat labi awla na tuud sambahayang tahadjud sabab lipat-manglipat in karyawan niya .
15. Bang siya makagaus mag-saddaka ha bulan Ramadan pa mga tau miskin labi marayaw sabab in pag-saddaka makapapas sin dusa ,
Patum-tum ha palihalan sin kababaihan ha bulan Ramadan
1. Subay mag-ikhlas in babai mag-ayuput ha bana niya ha bulan Ramadan duun nakan mag-adjal sin pag-bukaan iban pag-sahulan sin bana niya in katan hinang niya yan bang siya nag-ikhlas pa tuhan malagguh in madawhat niya tutungbasan sabab sin pag-ayuput niya ha bana atawa kan anak niya nag-pupuasa , damikkiyan niya in labi marayaw hasupaya siya makadawhat pa sin karayawan hasalugay niya nag-aadjal dumungug siya sin qur-an atawa kan mga nasihat ha palihan sin pag-agama .
2. Bang wayruun da udjul sin baran niya in malingkat amuin tumarawi siya pa masjid ha sarat amuin dih siya mag-pahamut iban mag-tamung amuin hiyaram sin sarah hasupaya madawhat niya in pahalah salagguh –laggu amuin ampunun in dusa niya nakauna .
3. Wajib parihalaun sin babai in sambahayang lima waktuh duun ha waktuh niya subay niya dih pahil-pahilun iban tarasaun .
4. In labi marayaw anarun sin duwaa maas in anak nila mag-puasa ha bulan Ramadan hasupaya mabiyaksah mag-puasa .
Dain din a sadya mura-murahan aun makawah natuh pangadjian duun ha laum niya yan sartah bang mayan papag-barakatun katuh in ummul iban waktu natuh bang mabut na in bulan ramadan , anduh kailu ayaw niyu mayan kalupahi in hambuuk taymnghud niyu ini dana in kawurgah niya sin mga duwaa niya pa allah
Wajib kataniyu mag-hambuuk iban manggayung-gung duun ha qur-an iban sunnah
( Fahad Haris )

Daing ha mga pangaddatan iban atulan sin mga ulama ahlu sunnah wal-jamaa in sila manawag-tawag ha mga manusiya in subay manggayung-gung iban mag-hambuuk ha qur-an iban sin sunnah , sartah aniban in pag-parak , damikkiayan niya in mga ulama ahlu sunna wal jamaa in sila walah nag-bati laul nanawagtawag ha mga manusiya iban ha kaulamaan ha palihalan bang aun piyag-lugatan iban piyag-sulangan ha antara nila subay nila hibalaik iban hiyanglah pa qur-an iban sunnat sin nabiy labay ha pamaham sin mga sila salaf yari in patum-tum nila katuh taniyu :

قال تعالى : { وَاعْتَصِمُواْ بِحَبْلِ اللَّهِ جَمِيعًا } فحبل الله يراد به هنا الإسلام والقرآن واتباع الرسول صلى الله عليه وسلم .
Parman sin allah mahasuti mahatinggi :
Iban pang-gayung-gung kamu katan duun ha lubid sin allah ) in tafsir niya in lubid sin tuhan amu na in agama islam iban sin qur-an iban pag-upi iban magad ha jung-jungan Muhammad salawat iban salam kaniya sin allah .
Daing ha sabab yan hisiyu-hisiyu in daing ha mga siyulagan sin muslim in kabuhih iban sin pag-agam niya miyamagad ha qur-an iban hadith sin nabiy sartah liyasa niya in mga ibadat amuin piyangdaakan kaniya sin allah nah! Sabunnal tuud nahinag niya na in tiranan hikasud niya pa laum sin surgah , in mga pitna iban panasat ha masa natuh bihaun jimatu in mga yan asal nag-bandah katuh taniyu in nabiy Muhammad salawat iban salam kaniya sin allah , sumagawah wayruun isab pitna amuin kiyabayath katuh sin nabiy malaingkan biyaytah daisab katuh niyu in ubat iban taming iban kalappasan daing mga pitna hangkan ha waktu mayan biyaytah sin jung-jungan Muhammad ha mga sahabat niya in pitna nangasubu in mga sahabat bang unu in tiranan hika guwah iban hika lappas daing ha mga pitna ha sabda niya :

وأخبر صلى الله عليه وسلم أنها ستكون فتن . قالوا : وما المخرج منها يا رسول الله ؟ . قال : ( كتاب الله ) (2) رواه الترمذي ( 5/2906 ) وقال : هذا حديث لا نعرفه إلا من هذا الوجه وإسناده مجهول، وفي الحارث مقال، والإمام أحمد ( 2/704 ) بتحقيق أحمد شاكر، والدارمي ( 2/3331 ) بتحقيق خالد العلمي وفؤاد زمرلي

Jumatu da in mga pitna : laung sin mga sahabat niya : unu in tiranan in hikalappas namuh daing ha pitna ya rasul sin allah ? sabda niya : in hikalappas niya daing ha pitna amuna in mang-gayung-gung kamu ha qur-an .
Ha sabda niya pa :
وقال صلى الله عليه وسلم : ( إنني تارك فيكم ما إن تمسكتم به لن تضلوا بعدي ـ كتاب الله وسنتي ) (3) رواه الإمام مالك في الموطأ ( 2/3/899 ) ، والحاكم في المستدرك ( 1/93 ) ، وقال صحيح الإسناد، وذكره الألباني في الصحيحة ( 4/1761 ) ]

Sabunnal tuud binun ku duun kaniyu ha salugay niyu nang-gayung-gung duun dih nakamu malaung salama-lama , amuna in qur-an sin allah iban sunnat ku
Taymanghud ku muslim nag-gugulal ahlu sunnah wal jamaa dung-dungi marayaw in paniyuk-niyuka pa bigih jantung mu in parman sin tuhan iban haith sin nabiy , bang biyaddiin in lasa iban pag-ayad katuh niyu sin nabiy Muhammad salawat iban salam kaniya sin allah , biyaytaan niya kitaniyu bang biyaddiin in hikalappas natuh daing ha mga pitna ,
In pitna mataud in jinasan niya :
1. Pitna sin altah iban pag-daya
2. Pitna sin masigpit biyah na sin wayruun altah .
3. Pitnah sin anak asawa
4. Pitna sin pag-kawasa
5. Pitna sin pag-agama
In katan pitna yan nabangkil sin tuhan halaum sin qur-an sartah kiyabaytah sin nabiy ha hadith niya , ha mga pitna nasabbut yan inn salagguh pitna bang in manusiya napitna in pag-agama niya , sabab pabila kimangih in agama sin hambuuk manusiya wayruun guna-sin kabuhi niya, nah! Wayruun makalappas katuh taniyu daing ha mga pitna yan malaingkan subay kitaniyu mang-gayung-gung ha qur-an iban ha hadith sin nabiy labay ha pamaham sin mga ulamaus salaf .
Daing ha mga kalabbiyahan sin bulan Ramadan
( Fahad Harris )


• In bulan Ramadan bulan salaggu-laggu sabab duun piyaturun in qur-an iban in agama islam ha tiranan sin qur-an yan nagaut niya in manusiya daing ha katikidluman maun pa kasawahan , iban daing ha kaawam maun pa panghati ilmuh sin tuhan sartah ha tiranan sin qur-an yan nakahati in mga manusiya sin dan mabuntul iban pag-agama sabunnal .
• In puasa hinang sin allah hambuuk daing ha mga rukun sin agama islam salagguh-laggu sartah in pag-tunay sin mga sambahyang sunnat iban sin mga ammal ibadat halaum niya mahinag siya tiranan hikalappas sin muslim daing ha api narkah jahannam .
• Ha bulan Ramadan ukabun sin allah in kalawang-lawangan sin surgah sartah tambulun niya in kalawang lawangan sin narkah iban hugutan niya in mga kasaytan-saytanan .
• Ha bulan Ramadan jimatu duun in pag-bunuh sin nabiy iban sin mga kapir mushrik sartah duun ha bulan yan dimaug in jung-jungan Muhammad salawat iban salam kaniya sin allah sartah diyamag in mga sila kapir ha adlaw badar .hika ruwa tahun na sin hijrah ( pag-lain sin nabiy maun pa madina ) .
• Duun ha bulan ramadan kawhaan kasubangan tahun hikawalu hijra naukab in hulah makka limanyut in agama islam iban timundug in panji sin la ilaha illah allah sartah napuh-puh in mga tau nag-sisirik sambil pa adlaw kiyamat dih na jumatuh in pag-sirik duun inshallah
• In pag-puasa ha bulan ramadam mahinang taming sin muslim daing ha narkah sartah mahinang niya daisab tiranan hikasud palaum sin surgah arrayyan .
• In puasa tiranan hika ampun sin mga paldusahan nakaunan amuin nahinang sin hambuuk muslim .
Ha sabda sin nabiy Muhammad salawat iban salam kaniya sin allah
)"من صام رمضان إيماناً واحتساباً غُفِرَ له ما تقدَّم من ذنبه ) أخرجه البخاري و مسلم
Hisiyu-hisiyu in namuasa ha bulan Ramadan karnah sin pag-iman niya pa allah iban pangahagari niya duun ha sarah niya iban karnah sin pag-angut niya sin tutungbasan daing ha allah nah! ampunun kaniya sin tuhan in mga dusa nakauna amuin nahinang niya .
Hati sin puasa bang ha sarah sin allah
In hati sin puasa : amuna in pag-tahga daing ha katan makabahtal sin pausa karnah pag-ibadat pa allah mag-tagnah daing ha pajar sadik ( subu ) sambil tumuhgum in mata suga .
Dain di ha ini makawah natuh pangadjian maniyuh tiyuh in pag-puasa bukun siya piyarduh sin tuhan karnah pag-tahga sadya sin uhaw iban hapdih , sah in maksud sin pag-puasa amuna in dumawhat in hambuuk ipun sin karidaan sin allah hangkan daing ha mga salgguh-lagguh hikmat sin pausa amuna in dumawahat in ipun sin kabugah pa allah ha tiranan hinangun niya in mga pardaakan kaniya sartah tinggalan niya in katan piyanglangan kaniya .
في قوله: {يأَيُّهَا الَّذِينَ ءَامَنُواْ كُتِبَ عَلَيْكُمُ الصِّيَامُ كَمَا كُتِبَ عَلَى الَّذِينَ مِن قَبْلِكُمْ لَعَلَّكُمْ تَتَّقُونَ } [البقرة: 183]
Ha parman sin allah :
Ya kamu mga amuin namamaratsaya bar-iman piyarduh kaniyu sin allah duun ha bulan Ramadan in puasa biyah sin kaparduh niya ha mga bar-iman nakauna daing kaniyu mura-murahan bang mayan kamu mag-mabugah .


Mga katawtaymanghuran ku ha agama islam , mura-murahan paragpakun kitaniyu sin allah pa bulan Ramadan , ha palihalan yan in bulan Ramadan ha tiyap-tiyap hangkatahun makaminsan siya dumatung pa kabuhih natuh ,sartah in bulan Ramadan in siya nag-dara rahmat ulung daing ha tuhan iban nag-dara kaampunan daing ha mahasutsi mahatinggi allah iban nagdara siya pamanduh ha mga manyusiya iban pamiat sin agama , iban in bulan Ramadan hangkan siya dumataung katuh hasupaya kita niyu pukaun niya daing ha galigapan sin mga paldusan amuin nahinang natuh halaum sin tahun limabay , sartah hasupaya niya kita hinduan sin pa upiksaun in mga ammal ibadat ta ha tahun limabay in mga walah imamu wajib ta subay pa amuhun sartah in mga puldusahan amuin nahinang ta ha tahun limabay wajib ta pag-tawbatawbatan pa tuhan , hangkan wajib katuh taniyu katan ha wayruun pa dimaratung in bulan Ramadan subay kitaniyu mag-tawbat na sin katan dusa amuin nahinang natuh , sartah sutsihun natuh in ammal lahil biyah na sin tunayun natuh na in katan piyandaakan katuh sin allah sartah aniban in katan liyangan niya iban ammal batin biyah na sin subay ta sutsihun in atay ta daing ha riyah ( hinag pag-pakitah-kitah ) iban jangki iban iggil iban na sin bang sawpama aun nara natuh nag-bahli atawa kan nag-kalu mabut na papag-ambul dah nah wajib katuh taniyu mag-maap miya api hasupaya minsan kitaniyu dagpakan sin bulan Ramadan in kitaniyu saddiya na ha mga piyangdaakan katuh niyu sin tuhan halaum sin bulan yan .
Sartah ha wayruun pa kitaniyu nakapg puasa wajib ha tiyap-tiypa siyulagan sin muslim hatihun niya bang unu namayan in hikataymah sin ammal ibadat niya dana in pag-puasa hangkan tawun natuh ha bigi jantung natuh sartah hibutang natuh duun ha pangatud sin kitaniyu dih mataymah in ammal ibadat sin hambuuk muslim bang wayruun duun ha pag-ibadat niya yan in duwa sarat ini
1. Tulus ikhlas mag-ibadat karnah sin allah .
2. Upihan in biyaytah sin nabiy iban kakahinang niya .
Sabab in tau mag-ammal ibadat wayruun tulus ikhlas niya in siya mahinang mushrik , sartah damikkiyan niya in tau mag-ammal ibadat niya walah siya imupi ha nabiy salawat iban salam kaniya sin allah in siya mahinang mabtadih ( nag-hinang-hinang sin agama niya ) .
Mura-murahan paabutun kitaniyu sin allah pa bulan puasa . salamu alaykum pa katan kanung-nungan ha agama islam .