Maksud sin Parhimpunan

Midanaoans Overseas Workers Association
(By:MOWA)

Sanglit iban pamudji pa katunggal sin Allah
Salawat iban salam pa Rasulullah
Da-na in liud niya mabut na pa mga sahaba
Lapay na in mga ummat niya amuin simaka sin limpa’ nila.

Na inumpung in mga kataymanghuran
Piyaladju in pamikil supaya in hula’ awun sungan
Timagbak pa atay nila subay mag pa-awun parhimpunan
Amuna in kabaktul sin MOWA Mindanaoans.

MOWA parhimpunan biyaktul ha karna’ sin Tuhan
Tuma-ud magpasaplag sin da’wa sin Islam
Akuhun in pakaradjaan misan agun di’ kagausan
Supaya umuntayaw in pag-agama ha hula’ kalasahan.

Ha kaguruhan tuma-ud iban mamawgbug
Supaya in agama Islam lumantup iban kumusug
Hipamahalayak in aqeeda sawasa’ bat di’ malubug
Tukuhun sin kitaniyu katan magtaud-taud.

Mana’abbiti kami kaniyu mga kataymanghuran
Karna’ maglumba’-lumba’ pa hinang karayawan
Parhimpunan MOWA subay kapag kainagunan
Mag hambuuk kitaniyu pikilan mag hangka biyutukan.

Tutusun natu’ in pangatayan natu’ sin ka’ikhlas
Bang magtabarru’ sin alta’ pa Islam subay ihilas
Supaya magbunga in alta’ natu’ misan dakuman hangka kintas
Allahu taala na in labi maingat katu’ niyu tumungbas.

MOWA parhimpunan bukun karna’ kabansagan
Supaya mabantug in tiyap-tiyap hangka tau iban kakilahan
Malayngkan ikhlas in pangatayan ha pakaradjaan sin Islam
Hipag tabarru’ in alta’ iban ginhawa baran.

In pakaradjaan pagpasaplag sin pag agama
Bukun ini parkala’ magaan iban bukun ula-ula
Bang kaw nag tabarru’ sin alta’ mu mabilang sadaqa jariya
Karayawan mu maggaganap misan kaw ha lupa’ punud na.

In sadaqa jariya karayawan bukun muwat
In pahala’ niya’ ini di’ mabugtu’ misan kaw mawapat
Ha sabab sin pag tabarru’ mu in agama imangkat
Pakuyagun kaw sin Allah ha hadarat Niya di’ mu hika iba-rat.

Ayaw kitaniyu mag-ikut iban mag-ug sin pilak natu’
Bang karna’ hika kusug sin pag agama ha hula’ natu’
Magsukul na kitaniyu bukun na sanjata’ in tanggungun natu’
Supaya daman sumannang in pag ibadat sin mga ka’anakan natu’.

Tammatan ku in tarasul karna’ pag patum-tum
Bulansang pakatan kataymanghuran amuin nagkainagun
Palitaan sin MOWA Mindanaoans ayaw natu’ puwngun
Tukuhun natu’ sin alta’ iban sangsa’ supaya in agama lumantup ha susungun.

Wabillahi tawpiq wal hidaya wassalamu ‘alaykum.