Hukuman sin pag-payguh

Hukuman sin pag-payguh

Pag-ka kiyapangadjian muna in hukuman sin tahara( kasutsihan ) daing ha hadath asibi iban sin makabahtal kaniya , bihayaun subay mu pangadjiun in hadath akbar/ dakula iban bang unu namayan in wajib payguan nag-parman in allah mahasutsi mahatinggi .

قول الله تعالى :) وَإِنْ كُنْتُمْ جُنُبًا فَاطَّهَّرُوا (

Hatiniya : bang in kaunan niya halaum junub nah! sutsiha niya in baran niya sinpag-payguh .

• Nasabbut ha mga kitab in kaunan sin mga arab nakaunan ha walah pa dimatung in agama islam in kaunan nila mag-payguh sila junub daing ha mga pamanduh hi nabiy Ibrahim alayhis salam nakapin kanila .

Adapun in mga kakahinang wajib payguan unum apabila mahinang sin hambuuk muslim in hambuuk daing kanila ini nah! wajib niya subay pay-guan .

1. Bang niyaugan siya mannih usug naka atawa kan babai duun hayan bang sawpama niya niya ugan siya mannih ha sahbu siya batih sartah duun ha pag-guwa sin manni yan siyartaan siya sin sarap nah! wajib kaniya in mamayguh junub , bang sawpama niya niya ugan siya mannih ha sahbu siya bati sah walah siyartaan sin sarap biyah na sin niyaugan siya mannih sabab sin nasasakit siya , nah! duun hayan walah na siya kiya wajiban mamayguh junub , bang sawpama niya nakataga inup siya ubus niya ugan siya mannih nah! wajib kaniya mamayguh junub , damikkiyan niya bang sawpama niya pag-batih niya daing ha katugan aun kitah niya bakkas sin manniy ha baran niya atawa kan ha tamungun niya wajib kaniya mamayguh junub , damikkiyan niya bang sawpama niya in siya nakataga inup sakali walah da siya niya ugan mannih iban wayruun bakkas duun sin manniy ha baran atawa kan tamungun niya nah! wayruun na siya kiyawajiban mamayguh junub .

2. Bang nag-dakpak na in awrat sin usug iban awrat sin babai duun ha kahalan yan wajib kanila duwa mamayguh junub ha sabda sin nabiy salawat iban salam kaniya .

عن النبي صلى الله عليه وسلم : إذا قعد بين شعبها الأربع , ثم مس الختان الختان ; فقد وجب الغسل(رواه مسلم وغيره

Hatiniya : apabila nag-dagpak na in upat anggawtah baran pag-ubus in awrat sin usug iban babai nagdakpak na nah! sabunnal tuud wajib na sila karuwa mamayguh jnub .

Duun ha hadith yan manunjuki sin wajib in pag-payguh junub apabila in awrat sin usug iban babai nag-dakpak na sarta kiyapag- mawpakkatn sin mga kaulmaan sin wajib na kanila duwa mamayguh sibuh da niya ugan sila mannih iban sin walah .

3. Apabila nag-muslim in kapir wajib kaniya mamayguh ha hambuuk papanaw sin mga kaulmaan sabab in nabiy salawat iban salam kaniya sin allah diyaak niya namayguh in kaibanan manusiya amuin nag-musilm sah kiyabaytah sin kamatauran ulama in pag-payguh sin kapir bang siya simud pa agama islam in hukuman niya sunnat bukun wajib sabab wayruun kiyabaytah daing ha nabiy in katan simud pa agama islam diyaak niya namayguh wa allahu ahlam .

4. Mait tau patay : amuin bukun parrang sabil ( shahid ) sabab in shahid dih na siya liguun .

5. Apabila natahay na in duguh bulan sin babai wajib kaniya in subay mamayguh daing ha haid ( biyulan ) .

6. Nifas Apabila natahay na in duguh nifas sin babai wajib kaniya in subay mamayguh .

Aturan sin pag-payguh junub

• Subay siya mag-niyat duun ha laum atay niya sin mamayguh siya junub
• Ubus ampa siya mag bismillah sartah hugasan niya in duwa lima niya makatu iban hugasan niya in awrat niya .
• Ubus ampa siya mag-ayil biyah sin pag-ayil niya bang siya mag-sambahayang .
• Ubus ampa niya buhsugan in uh niya makatu bassaun niya sin tubig in puunan sin buhuk niya .
• Ubus ampa niya buhsugan in katan baran niya sin tubig sartah hilugan niya in baran niya sin lima niya hasupaya suminup in tubig pa baran niya .

• Wajib ha tau namayguh daing ha junub usug naka atawa kan babai subay niya tuud basaun in puunan sin buhuk niya iban na sin katan anggawtah baran niya sabab bang sawpama niya aun daing ha mga tampat sin baran niya wayruun nabasah dih mataymah in pag-payguh niya junub sabab sabda sin nabiy salawat iban salam kaniya sin allah .

وقال صلى الله عليه وسلم : )تحت كل شعرة جنابة ; فاغسلوا الشعر , وأنقوا البشر ( رواه أبو داود والترمذي .

( ha tiyap tiyap siyulagan puunan sin buhuk junub , nah basaa niyu in buhuk dana in puunan niya . sartah sutsiha niya in baran niyu ) .

• Damikkiyan niya dih siya manjari mag-usibah tubig duun ha pag-payguh .
• Damikkiyan dih s iya manjari mamayguh nag-huhubuh atawa kikitah in awrat niya bang aun tau wajib niya tabunan in awrta niya . ha sabda sin nabiy salawat iban salam kaniya sin allah

فإذا اغتسل أحدكم ; فليستتر رواه أبو داود والنسائي .

( apabila mamaygu in hambuuk daing kaniyu subay niya tabunan in awrtat niya . )

• In pay-guh daing ha junub amanat daing ha tuhan sabab wayruun makakitah kaniya iban maka ingat tuput ha antara niya ipan sin tuhan , daing ha sabab yan wajib subay niya parihalaun iban pasampurnaun in pag-hinang kaniya bang sawpama aun dih niya kaingatan wajib kaniya in subay mangasubu pa mga sila taga panghati , sabab in kasutsihan daing ha mga sarat sin hikataymah sin sambahayang daing ha sabab yan subay dih haman hamanun sin muslim bang mayan hidayatan in katan muslim humati sin agama islam .