Pag-tawhid

Pag-tawhid

Muna-muna subay ta kahatihan in katan ammal ibadat amuin hinangun ta subay tuud duun in panawhid / kaihklas pa tuhan, sabab piyarduh katuh taniyu in sambahayang iban pag-zakat iban puasa iban pag-hadjih mabut na pakatan ammal ibadat karnah hasupaya patunggalun in katan ibadat pa allah mahasutsi mahatinggi,sabab wayruun pus paidda sin ammal ibadat sin hambuuk manunsiya apabila larak in panawhid niya pa allahu ta’ala sabab laung sin mga ulama in panawhid biyah siya hantang kasutsihan duun ha sambahayang , maytah ? sabab in tau nag-sambahayang wayruun ayil niya atawa kan walah siya nakasutsih daing mga hadath / tantu dih tuud taymaun in sambahayang niya , nah! biyahayan da in damikkiyan niya in pag-tawhid pa allah dih taymaun in ammal ibadat sin hambuuk manusiya apabila kimangih in pag-tawhid niya pa allah .
Unu in mahna sin tawhid ?
In mahna sin tawhid : amuna in mag-paratsaya kaw sin siyara in tuput tag-amulahi sin katan piyapanjari , iban mag-paratsaya kaw sin siyara in tuput pag-ibadatan sarta mag-paratsaya kaw kaniya sin wayruun salih sabanding in kangan nganan niya iban sin mga sipat niya .
Hapalihalan yan bang kaw ammal ibadat subay tuud in kaunan sin pag-ibadat mu ihklas siya pa allah patunggalun mu in katan ibadat mu pa tuhan .iban dih mu siya sakutuhan duun ha katan ammal ibadat mu , sabab bang mu nasampurnah in pag-tawhid pa allah dain di pa ha dunya pasangyangun nakaw sin allah iban kananaman muna in parasahan iban kasanyangan ,hangkan in panagnaan panawagtawag sin tuhan halaum qur-an niya mahamulliya pa mga ipun niya amuna in tawhid ha parman niya :
قال الله تعالى : ( يأيها الناس اعبدوا ربكم )

Hatiniya : ya kamu mga manusiya pag-tagipun kamu pa tuhan niya .

Laung hi Abdullah ibn abbas kiyaridaan siya sin allah : in katan lapal halaum sin qur-an ( uhbudu ) magmahna siya ( wahhidu ) patunggala niyu pa allah in pag ibadat niyu .
Hatiniya bang kitah mag-ibadat subay da siya halaum panawhid pa tuhan iban halaum ikhlas kaniya , hangkan in allah nag-daak katuh niyu sin patammatun in kabuhih natuh halaum panawhid kaniya sartah nagdaak katuh taniyu in hilapal natuh kalimah ha kahinapusan sin napas natuh , kalima attawhi ( lailaha illah allah )
Ha parman sin allah :
قال الله تعالى : ( واعبد ربك حتى يأتيك اليقين )
Hatiniya : pagtagipun kaw pa tuhan mu sartah pag-ikhlas kaw kaniya ha pag-ibadat mu sahingga dakpakan kaw sin kamatay .

Sabda sin nabiy salawat iban salam kaniya
( من كان آخر كلامه من الدنيا لا إله إلا الله دخل الجنة )

Hisiu-hisiu in kaunan sin bissa niya hinapusan di dunya la-ilah illah allah pasuruun siya sin allah pa laum sin surgah.
Hangkan wajib katuh taniyu sakahabah waktu mag-upiksah sin niyat natuh sartah barmulahun natuh in ammal ibadat natuh sin pag-ikhlas iban pag-tawhid pa allah ,hasupaya maparihalah daing ha mga shirik iban riyah / hinang pag-pakitah kitah iban pag-parungug dungug ,sabab in allah dih tuud taymaun niya in ammal ibadat amuin kiyalaumuran riyah .

Biyaddin in kadawhat sin mattan pag-tawhid pa allah ?

Madawhat in kasabunnalan sin tawhid duun ha tu parakala :
1. Subay aniban in shirik dakulah / biyah na sin mag-tunggah pa tau patay mangayuh duwaa pa tampat iban pa tau patay atawa kan panunuk iban na sin dugaing niya .
2. Subay aniban in shirik asibi / biyah na sin riyah hinang pagpakitah kitah iban hinang pag-parungug dungug iban na sin dugaing niya .
3. Subay aniban in mga mahsiyat piyanglangan sin tuhan iban aniban in katan kakahinang bahgu ha agama / biyah na sin pag-birht day valintines pag-mawlud pag-hinang pitu iban na sin dugaing niya .
Nah! bang ta kiya aniban in mga kakahinang yan tantu nabunnal tana in pag-tawhid pa tuhan .