Mga makabahtal sin ayil ( wuduh )

Mga makabahtal sin ayil ( wuduh )

Pag-ka kiyaingatan muna in sarat sin pag-ayil iban wajib sin pag-ayil mabut na pa sunnat niya , bihaun kagunahan mu ingatun bang unu na mayan in makahtal sin ayil iban makalarak kaniya , bang in daing ha mga hinang yan mahinang mu mabahtal in ayil mu
1. Katan gimuwah daing ha duwa lalabayan duun nakan... ihih atawa kan tai atawa kan utut atawa kan madhih atawa kan manni
• Bang sawpama niya gimuwah in ihih iban sin tai mabahtal in ayil kiyabaytah sin allah ha qur-an sartah kiyapagmawpakkatan sin mga ulama ha parman sin allah

قال تعالى: ) أَوْ جَاءَ أَحَدٌ مِنْكُمْ مِنَ الْغَائِطِ (
Hatniya : atawa kan nakajamban in hambuuk daing kaniyu mabahtal in ayil niya .
• Damikkiyan Bang sawpama niya giyuwaan sin manni atawa kan madhi ( in madhi magguwa siya apabila in tau datungan shahwa ) mabahtal in ayil niya kiyabaytah ha hadith sin nabiy iban kiyapaghambbukan sin katan kaulamaan kiyabaytah hi ibnul mundhir iban na sin dugaing niya .
• Damikkiyan niya mabahtal in ayil apabila guwaan in babai sin dugu istihada ( in dugu istihada dugaing daing ha duguh biyulan ) in istihada duguh sakit sabda sin nabiy salawat iban salam kaniya sin allah kan Fatima bint abi hubaish ;
فقال لها النبي صلى الله عليه وسلم :} فتوضئي وصلي , فإنما هو دم عرق { رواه أبو داود والدارقطني , وقال : إسناده كلهم ثقات
( pag-ayil kaw sartah sambahayang kaw sabunnal tuud in duguh muyan duguh sakit ) [kiyariwayat hi abu daud iban hi daru al-qutniy ]

Adpun in aturan sin babai aun istihada niya mag-ayil sadya siya apabila sumud na in waktu sin sambahayang nah! bang sawpama niya mag-bang na hugasan niya in duguh ha awrat niya ampa siya mag-ayil ubus ampa niya butang in awrat niya duun naka napkin iban sin dugaing niya hasupaya dih mag-tu in duguh niya ubus ampa siya sumambahayang inshallah in tumuh duguh daing ha awrat niya ha sahbu siya nag-sasamabahayang dih da siya makabahtal tuyun niya in pag-sambahayang niya .
• Damikkiyan niya mabahtal in ayil apabila gimuwah in utut kiyabaytah sin nabiy ha hadith niya ( sahi ) bunnal iban kiyapagmawpakkatn sin mga kaulmaan ha sabda sin nabiy salawat iban salam kaniya sin allah

قال صلى الله عليه وسلم : }ولا يقبل الله صلاة أحدكم إذا أحدث حتى يتوضأ {
( dih taymaun sin allah in sambahayang sin hangkatau daing kaniyu apabila aun hadith niya sahingga siya makapag-ayil )

• Ha tungud amuin gimuwah bukun daing ha duwa lalabayan hatiniya amuin gimuwah daing ha baran biyah na sin nag-duguh in baran niya sabab aun palih niya atawa kan suka atawa kahak in yan naun in khilaf ( piyagsulangan ) sin mga kaulmaan ha tungud sin hukuman niya unu makabahtal siya atawa dih ? aun daing ha mga ulama nag-iyan makabahtal siya aun daing kanila nag-iyan dih siya makabahtal aun daing kanila nag-iyan mabahtal bang mataud sah! Bang hangkatiyuh dih siya makabahtal sin ayil sah laung hi sheikh fawzan ha kitab niya mulakhas fiqhiya : ( in papanaw makusug iban bunnal dih siya makabahtal sah in labi marayaw mag-ayil siya hasupaya sin makaig daing ha khilaf ) gikapan 45 / babu nawaqidul wuduh .

2. Daing ha mga makabahtal sin ayil apabila nalawah in akkal sin manusiya ha sahbu in in kaunan niya halaum ayil duun nakan piyunung siya atawa kan katug atawa kan narupang siya .
• Bang sawpama niya in tug niya bukun da mahaluk amuin makasambung pa siya bang siya dahun mag-bissara sartah kahatihan niya bang unu in bissara sin pangdaig niya duun naka nag-titindug siya atawa kan naglilingkud siya nakatug dih mabahtal ijn ayil niya .

3. Daing ha mga makabahtal sin ayail bang siya nakakaun unu untah sibuh da matud iban sin tiyuh-tiyuh dana in gatas sin untah .
روى أحمد في «مسنده» بسندٍ حسن عن أُسيد بن حُضير أنَّ النبيَّ صلّى الله عليه وسلّم قال: «تَوضَّؤوا من ألبان الإِبل» أبو يعلى رقم (632).

Daing kan usaid ibn hudair sabunnal tuud in nabiy salawat iban salam kaniya sain allah nagsabda : ( pag-ayil kamu apabila kamu naka-inum gatas sin untah ) .

Sah laung hi ibnu uthaymin kiya-ulungan siya sin allah : ( in papanaw bunnal ha tungud sin gatas sin untah dih siya makabahtal hatiniya sunnat in mag-ayil balik apabila siya naka inum gatas sin untah .sabab in hadith yan malamma ( daif ) laung sin kaibanan ulama / ha kitab sharhul mumtih babu nawaqidul wuduh .

Ha tungud sin unud untah makabahtal siya in dalil niya ;

حديث جابر بن سَمُرَة رضي الله عنه أن رجلاً سأل النبيَّ صلّى الله عليه وسلّم: أنتوضَّأ من لحوم الإِبل؟ قال: «نعم، فتوضَّأ من لحوم الإِبل»، قال: أنتوضَّأ من لحوم الغنم؟ قال: «إن شئت فتوضَّأ، وإِن شئت فلا تتوضَّأ» رواه مسلم، كتاب الحيض: باب الوضوء من لحوم الإِبل، رقم (360).

Daing kan jabir ibn samura kiyaridaan siya sin allah sabunnal tuud in hambuuk usug nangasubu ha nabiy salawat iban salam kaniya sin allah laung niya : unu mag-ayil kami apabila nakakaun kami sin unud untah ? sabda sin nabiy :( huun pag-ayil kamu bang kamu nakakaun unud untah ) laung sin usug : unu mag-ayil kami apabila kami nakakaun unud kambing ? sabda niya : ( bang kaw mabayah pag-ayil pag-ayil kaw bang kaw dih na mag-ayil wayruun da sah niya )

حديث البراء، وفيه: «توضَّؤوا من لحوم الإبل» رواه أبو داود، كتاب الطهارة: باب الوضوء من لحوم الإبل، رقم (184)، والترمذي، أبواب الطهارة: باب الوضوء من لحوم الإِبل، رقم (81)، وابن ماجه، كتاب
الطهارة: باب ما جاء في الوضوء من لحوم الإبل، رقم (494)، وابن خزيمة رقم (32) من حديث البراء بن عازب.

Hadith daing kan barah sabda sin nabiy salawat iban salam kaniya sin allah sabda niya : ( pag-ayil kamu apabila kamu nakakaun unud untah )

• Aun daing ha mga kakahinang nag-khilaf in mga kaulmaan bang siya makabahtal sin ayil atawa kan dih biyah na sin makakumpit sin awrat ha wayruun lampik atawa kan makakumpit babai amuin maharus kaniya iban sin pag-liguh ga tau patay iban sin tau nag-murtad daing ha agama islam aun daing ha ulama nag-iyan makabahtal aun daing kanila nag-iyan dih makabahtal in tiyap-tiyap papanaw aun dalil niya sah in labi marayaw ,mag-ayil na siya hasupaya siya makaig daing ha khilaf .

Undang-undangan biyutang sin sarah ha kasutsihan iban ha pag-ayil

• Bang in tau halaum yakin siya sabunnal tuud in siya halaum ayil pag-ubus nag-duwa-ruwa siya ha baran niya bang siya halaum hadath atawa halaum ayil nah! duun hayan in hukuman niya in siya halaum ayil sabab in asal niya in siya halaum ayil iban halaum yakin siya in kaunan niya halaum ayil siya .
• Damikkiyan niya bang sawpama niya yakin siya sabunnal tuud in siya halaum hadath pag-ubus nag-duwa ruwa siya baran niya bang siya halaum ayil nah! duun ha kahalan yan subay siya mag-ayil sabab in asal niya in siya ha masi halaum hadath dih niya maig sin pag-duwa-ruwa .